Два з паловай гады «хіміі» – за абразу двух супрацоўнікаў МУС у «Аднакласніках»
5 лістапада суд Першамайскага раёну Віцебску вынес рашэнне ў справе, распачатай паводле арт. 369 КК («Абраза прадстаўніка ўлады») у дачыненні да 41-гадовага цесляра аднаго з менскіх будтрэстаў Аляксандра Сафонава. За абразлівыя каментары пад допісамі Вольгі Карач у «Аднакласніках» суддзя Алена Жук прыгаварыла Сафонава да двух з паловай гадоў абмежавання волі – «хіміі».
Паводле абвінавачання, 24 чэрвеня, а таксама ў перыяд з 9-га па 11 ліпеня 2020 году, пад двума допісамі Вольгі Карач у сацсетцы «Аднакласнікі» Аляксандр Сафонаў пакінуў са свайго мабільнага тэлефону каментары з негатыўнай ацэнкай службовай дзейнасці супрацоўніка ДАІ з Ганцавічаў Ігара Вольніча і міліцыянта з Бабруйску Андрэя Комара.
На судзе Сафонаў віну цалкам прызнаў і раскаяўся.
Ён даводзіў, што не меў намеру абразіць супрацоўнікаў міліцыі, а грубасць у каментарах дапусціў, бо знаходзіўся ў дэпрэсіўным стане да пад негатыўным уплывам каментароў, пакінутых раней іншымі наведнікамі. У апошнім слове абвінавачаны прасіў суд быць «прыхільным да яго» і не абмяжоўваць ягонай свабоды.
Падчас судовых спрэчак пракурорка Вікторыя Драгель запатрабавала для Сафонава два з паловай гады «хіміі».
На абвяшчэнне прысуду 5 лістапада журналістаў не пусцілі, бо абвінавачаны пажадаў, каб судовае рашэнне было агучанае «без прысутнасці пабочных асобаў».
Пасля суду Аляксандр Сафонаў паведаміў, што суддзя Алена Жук прызнала яго вінаватым і пастанавіла накіраваць у папраўчую ўстанову адкрытага тыпу на два з паловай гады. Апроч таго, суд абавязаў яго кампенсаваць міліцыянтам маральную шкоду. Агульная сума кампенсацыі склала 1500 рублёў.
Ці будзе абскарджваць Аляксандр Сафонаў вырак у Віцебскім абласным судзе, пакуль не вырашыў, піша vitebskspring.org.
Два з паловай гады «хіміі» запрасіла пракуратура за абразу міліцыянтаў
Подписывайтесь на нас в: Яндекс, Дзен, Google Новости, Telegram-канал, «секретный» Telegram-чат!