«Экстрэмісцкімі» прызналі докшыцкую суполку з аб’явамі і віцебскі студэнцкі Telegram-канал

Автор:

Опубликовано:

Декабрь

2022

Комментарии: нет комментариев

У апошнія дні снежня Рэспубліканскі спіс экстрэмісцкіх матэрыялаў папоўніўся згадкамі пра тры інтэрнэт-рэсурсы. «Экстрэмісцкай інфармацыйнай прадукцыяй» прызналі суполку «Докшицы Live» у сацыяльнай сетцы «ВКонтакте», а таксама Telegram-канал пад назвай «Свободный ВГУ» и аднайменны Telegram-чат, заснаваныя студэнтамі Віцебскага дзяржаўнага ўніверсітэту. Адпаведныя судовыя рашэнні прынятыя 23-га снежня. Цяпер тыя, хто зробіць рэпосты з гэтых рэсурсаў, могуць быць прыцягнуты да адміністрацыйнай адказнасці, нават калі гэта будзе абвестка пра згубленыя ключы ці пошук майстра па манікюры.

«Суполка «Докшицы LIVE» УКантакце прызнаная «экстрэмісцкімі матэрыяламі». У суполцы 12.878 падпісчыкаў, яна зʼяўляецца гарадскім форумам і барахолкай. У ціхім Докшыцкім раёне адным росчыркам пяра стала трынаццаць тысяч экстрэмістаў», – напісаў у Фэйсбуку тамтэйшы краязнаўца Канстанцін Шыталь. Ен і сам не аднойчы размяшчаў там гістарычныя фотаздымкі ці нарысы, але ў асноўным людзі публікавалі ў суполцы аб’явы або дзяліліся мясцовымі навінамі. Кшталту гісторыі пра гарадскую ёлку ў Докшыцах, якую дзеля ўстаноўкі ў цэнтры нібыта незаконна спілавалі каля нежылой хаты, не спытаўшыся дазволу ў гаспадароў. «То бок «продам гараж», «сниму квартиру» і «пристройте миленьких котяток» – гэта ўжо экстрэмісцкія матэрыялы?» – каментуюць рашэнне Чашніцкага райсуду інтэрнэт-карыстальнікі.

Рашэнне пра прызнанне экстрэмісцкімі Telegram-канала «Свободный ВГУ» і Telegram-суполкі «Свободный ВГУ Чат» было прынята віцебскім судом Кастрычніцкага раёну. У згаданага вышэй Telegram-канала ўсяго 26 падпісчыкаў, а апошнія даступныя допісы зроблены амаль год таму – 26-га лютага. У аднайменным чаце – 53 удзельнікі, і там ужо апублікавалі звесткі пра ягоны «экстрэмісцкі» статус.

https://vkurier.news/telegram-kanal-vitebsk-97-pryznany-ekstremisckim-farmiravannem/